معلش يا حبيبتى بابا وماما مش موافقين

( كلاكيت تاني مرة – على طرابيزة فى النادي- هو باصص فى الارض- وهى مبحلقه فيه )
سلوى : هاااا يا مدحت كلمتهم فى موضوعنا
مدحت : كلمتهم بس للاسف مش موافقين
سلوى: وانت قولت ايه ؟
مدحت : مقولتش
سلوى : وناوى على ايه ؟!
مدحت: مش عارف
سلوى : طب لما تعرف تباه تقولى
( وتتركه سلوى وتنصرف غاضبة )
-----------قطع----------
لو أنت مكان مدحت تعمل ايه ! .. وهل ده يعتبر ضعف شخصية من مدحت قدام اهله .. وهل من الممكن أنك تتجوز واحدة اهلك مش موافقين عليها حتى ولو كان ده ممكن يغضبهم .. والأهم من ده كله هل أنت شايف ان من حق اهلك انهم يدخلوا فى اختيار شريكة حياتك ؟!
طب تعالوا نتكلم واحدة واحدة
دلوقتى مفيش حد يقدر يجبر شاب انه يتجوز واحدة هو مش عاوزاها .. وغالبا الشباب اللى بيتحججوا بموضوع إن الأهل مش موافقين ملهمش رغبة جادة فى إتمام عملية الزواج أو بمعنى اصح عاوز يفلسع بطريقة تحفظ له ماء وجهه..لكن ده ميمنعش أن فيه فعلا شباب مش بيحبوا يتجوزوا دون رغبة أهاليهم ومباركتهم للزيجة دي .. وهنا وفى أحوال كثيرة قد يحصل الاختلاف بين وجهات النظر .. بين وجهة نظر الأب أو الأم ووجهة نظر الابن .. وما بين الاختلاف بين وجهتين النظر تظهر معها الشعارات فالاب والأم يرفعوا شعار (( إديها خبرة .. يعنى إحنا اكثر منك خبرة وتجارب ولازم تسمع الكلام )) .. ويرفع الابن شعار (( هو انا اللى حتجوز ولا أنتوا؟! )) .. ويحصل الاصطدام بين وجهات النظر .. ويقع الشاب فى حيرة بين اهله وبين قلبه .

شوف يا برنس.. القضية دى أولا وأخيرا مفاتحيها فى إيدك إنت ..فى كيفية إتخاذ القرار فى موضوع خطير زى موضوع الإرتباط .. وتكون محدد لنفسك منهج تفكير سليم ماشى عليه فى إختيار شريكة حياتك .. فتكون محدد المواصفات اللى أنت عاوزاها من تكافؤ فى كل شىء علمى ونفسى واجتماعي ودينى وكمان شكلى ، والشكل ده مسألة نسبية وبترجعلك إنت .. بعدين تقارن كل المواصفات اللى انت عاوزها وتعملها إسقاط على شريكة حياتك .. وتشوف هى دى ولا مش هي .. لان يا باشا لازم يكون إختيارك ناتج عن العقل والقلب مع بعض .. مينفعش يكون واحد فيهم بس ..بعد كده اسمع لوجهة نظرأهلك والأسباب اللى هم إستندوا عليها فى عملية الرفض دي ..وماذا تعنى ( غير مناسبة ) من وجهة نظرهم ..فإذا وجدت ان فتاتك بها كل مواصفات أحلامك اللى انت حددتها بالعقل والقلب .. ووجد ان رأى أهلك فيه نوع من الإعضال وعدم الموضوعية فى الرفض إذن يكون رأى أهلك رأى إستشاري فقط .. فزواج الرجل لا يحتاج إلى ولي ولا يشترط الشرع أن يوافق والد أو والدة العريس على العروس ..لكن البيت السعيد لا يمكن أن تكتمل فرحته من غير عدم رضا كل الاطراف عن الزيجة دى يا باشا ..

علشان كده لازم تتجنب الصدام مع أهلك وخصوصا فى البدايات ..لأن ديما البدايات بتكون فيها المشاعر متوترة والنقاشات بتكون حادة وعصبية نوعا ما ..وحاول أنك تتكلم مع أهلك برفق ولين حتى لا تقع فى العقوق المنهى عنه شرعا .. وفى نفس الوقت ابحث عن حد تثق فيه ويكون له تأثير على أهلك وتجعله يكلمهم فى موضوعك ..وأخيرا ليس لك إلا الحوار مع اهلك ويكون نفسك طويل فيه حتى تقنعهم .. وتقولهم انك حتتحمل تبعات اختيارك .. لكن يا باشا متنساش حاجات مهمة إنك تتعامل مع وجهات نظر اهلك فى العروس بموضوعية وتفكر فيها وان الجواز بغير رضا الأهل لا يُفضل إلا إذا كان رأيهم ظالم وفيه إجحاف، وبعدين حتى لو اتجوزت من غير رضا اهلك إياك ثم إياك إنك تقاطعهم حتى ولو هم قاطعوك لأن فى الغالب تصرفهم ده حيكون رد فعل مؤقت .

» °¨¨™¤¦ حبيبتى ¦¤™¨¨°
» لله يخرب بيتك يا حبيبتى