لحد هنا و Stop انا خلاص توبت

هاللو يا جماعة ازيكوا كده

عايزة اتكلم معاكوا فى موضوع حصل قدامى كتيييييييييييير

ادخل فى الموضوع على طول

لو بصينا على انواع الارتباطات فى مصر المحروسة (بين اى ولد و بنت طبعا) هنلاقيها

1-جواز

2-خطوبة

3-ارتباط عاطفى (على رأى اسامة منير)

وهو ده موضوعنا بالظبط الارتباط العاطفى وعشان الناس اللى ثقافتهم محدودة شوية نشرح المقصود بكلمة ارتباط عاطفى

الارتباط العاطفى ده بيبقى بين اتنين (شاب و بنت) و بتبقى علاقتهم مع بعض كأنهم مخطوبين بالظبط يعنى خروجات و

فسح و كلام فى الموبايل طول الليل ده غير طبعاً هدايا عيد الحب و شم النسيم و راس السنة و عيد ميلادها و عيد ميلاده

مقضينها يعنى و طبعا فى الكلية و كده كله عارف ان دى تبع ده و محدش يقدر يقرب منها

وفى معظم حالات الارتباط العاطفى بيكون اهل البنت ميعرفوش حاجة عن الحوار ده كله او مؤقتا حتى لحد ما الشاب يقدر

يكون نفسه و يتقدملها (فى المشمش طبعا)

ندخل بقه فى صلب الموضوع ممكن بين يوم و ليلة البنت ديه لسسبب ربنا و حده يعلمه تفوق لنفسها وتعرف ان اللى هى

بتعمله ده غلط و حرام غير كمان رغبتها الشديدة فى انها تتخلص من شعورها بالذنب تجاه اهلها اللى حاسة بخيانتها لثقتهم فيها

ويبدأ الشاب يتصل بيها متردش يحاول يكلمها فى الجامعة تتهرب منه و هكذا لحد ما يصحى من نوم على مسج من حبيبته

الدلوعة بتقوله فيه لحد هنا و STOP انا خلاص توبت

اكيد هيكون موقف صعب اوى عليه زى ما هو صعب عليها بس هى خلاص ربنا هداها و مصبرها لكن هو هيعمل ايه ده

متعلق بيها جدا

وده اللى انا عايزة اسأل فيه لو كنت فى الموقف ده هتعمل ايه

هتكلم باباك و تتقدملها و تقروا حتى فاتحة بس عشان تكون علاقتكم شرعية

ولا هتقول المركب اللى تودى هو مفيش بنات غيرها يعنى ده انا كل بنات الجامعة هيموتوا عليا

ولا هتتصرف حاجة تالتة خالص

يا ريت لو تصرف تالت تقولولى ايه هو

وممكن برضه يحصل العكس يعنى تنعكس الادوار البنت هى اللى تصحى على مسج من بوى فريندها بيقولها فيه لحد هنا و STOP انا خلاص توبت

لو انتى بقى كنتى فى الموقف ده

هتحاولى تقنعيه انه يتقدملك

ولا هتكبرى دماغك و تقولى لنفسك شوية وانساه

ولا تصرف تالت خالص ايه هو طبعا

بتهيألى واضح اوى الشباب هترد على ايه و البنات هترد على ايه

يلا مستنية ردودكم