هوّه بعينه ...هوّه بغباوته

# همممم...قوليلى :
بتبقى فى عز النوم وتصحى تفكرى فيه؟؟
* ايوة
# وتشوفى طيفه قدامك؟..رايح جاى ..نفسك تفضلى تتكلمى معاه..وتحكيله ؟؟
* ايوة
# وتنامى ..تحلمى بيه؟؟
* بالظبط .. كل اللى قولتيه تمام قوليلى ... دة بقى اسمه ايه؟
# استنى ..استنى....قوليلى :
بتصحى م النوم ...تبصى على الساعة بلهفة ...وتتمنى لو تجرى شوية..وتقومى ,,تختارى هتلبسى ايه
واقفه قدام المرايا ,,تلبسى وتغيرى ..وتمثلى سيناريوهات ..ازاى اول ماتشوفيه هتعملى ايه ...تسلمى عليه ..كدة
..هتقولى ..كذا....وبعدين تنزلى م البيت جرى ..قلبك بيسبق خطوتك ع المكان اللى هوّه فيه
واول ما توصلى ..تفضل عنيكى تدور عليه ..مش موجود..؟؟..تستنيه..بلهفه ..عينك رايحة جية..وقلبك بيعزف سيمفونية الشوق جوة ضلوعك
اه ...اخيرا وصل ..قلبك هيقف ..مرتبكة ...متلخبطة...حاسة كل الناس بتبص عليكى ..وف نفس الوقت ...مش حاسة بالناس.......لاء اجمدى ..مش لازم حاجة تبان ...كدة تقولى لروحك..والغريبة ان كل حاجة باينة
خطوته بتقرب ليكى ..بيمد ايديه يسلم ..ايديكى بتترعش..وعلى قد مانفسك تسيبيها ف ايده...تسحبيها بسرعة
يبص فى عنيكى ..عنيكى تهرب...تبصى فى كل حتة الا عنيه...كرات دمك بتسابق بعضها فى عروقك
وتفضلى تراقبى كل تحركاته ..سكناته ..كلامه ..ضحكته...وقفته..وتتمنى الوقت يقف..والارض ما تتحركش
بس للاسف ..الوقت بيعدى ..وييجى يمشى ..تحسى روحك بتنسحب منك..بتتخطف..اخدها معاه..وعنيكى تفضل عليه..ماشية وراه...وتقفى سرحانة وسط الناس...سمعاهم ومش سمعاهم ...معاهم ومش معاهم
وتحسى انك مبسوطة وطايرة ومانتش عارفة ليه؟
وتتكلمى وتضحكى مع كل الناس..حتى اللى كنتى مخصماهم..ناسية انك مخصماهم...وتلاقى نفسك مفتوحة للدنيا
عايزة تضميها بين ايديكى...وشايفة كل حاجة حلوة ف عنيكى
ايه رأيك ...صح اللى انا بقوله ؟؟؟
* تمام والله ..انتى بتوصفيه ..كأنك انا ..دابالظبط؟؟؟عرفتى ازاى كل دة ؟؟....وايه دة بقى اللى انا فيه؟؟
# عارفاه ...عشان عيشاه ...مانا زيك واقعة فيه
*هوّه ايه ؟
# هو فيه غيره ..هوّه بعينه ...هوّه بغباوته....
الحب